Hér er uppskrift að sultu eða mauki sem er gott eitt sér á brauð eða kex, svo og með ostum, en hentar líka vel með ýmsu kjöti og á vel heima á jólaborðinu. Líklega er annars  réttara að kalla þetta mauk en sultu því hér er enginn viðbættur sykur og á móti sætunni úr gráfíkjunum og appelsínusafanum kemur dálítið balsamedik.

Úr þessu ætti að verða svona ein krukka. Maukið geymist í 1–2 vikur í kæli en annars er best að frysta það.

Gráfíkjur, appelsína, timjan, balsamedik, kanell og salt, það er hráefnið í maukið. Enginn sykur semsagt (nema sá sem er í ávöxtunum, náttúrlega).

Ég var með 400 g af mjúkum gráfíkjum (hálfþurrkuðum). Byrjaði á að skera stilkana af þeim og saxaði þær svo gróft.

Svo setti ég þær í pott, kreisti safann úr appelsínunni yfir (ef maður vill meira appelsínubragð mætti byrja á að fínrífa börkinn út í).

Svo bætti ég 3-4 msk af vatni og 1 msk af balsamediki í pottinn ásamt nokkrum timjangreinum, kanel á hnífsoddi og svolitlu salti. Hitaði að suðu og lét þetta malla undir loki í 10–15 mínútur, eða þar til gráfíkjurnar voru meyrar og mestallur vökvinn gufaður upp.

Ég lét maukið kólna í nokkrar mínútur. Veiddi svo timjangreinarnar upp úr en settu allt hitt úr pottinum í matvinnsluvél og maukaði vel.

Setti heita sultuna í krukku og lokaði. Ég lét hana kólna alveg og setti hana svo í ísskáp.

Þetta mauk er alveg ágætt. Það er að segja ef maður kann að meta gráfíkjur. Sem ég geri vissulega.

Gráfíkjumauk

400 g gráfíkjur

safi úr 1 appelsínu

3–4 msk vatn

1 msk balsamedik

nokkrar timjangreinar

kanell á hnífsoddi

salt á hnífsoddi