Rækjuréttur sem má sleppa rækjunum úr

Eitt af því sem ég á einhverjar birgðir af í frysti (hvers vegna veit ég ekki alveg) er hráar risarækjur; annað er hörpuskel, en ég veit reyndar hvers vegna hún er þarna, ég ætlaði að vera með hana í matarboði sem ekkert varð svo af. Það verður örugglega hörpuskel í matinn hér á bæ einhvern næstu daga. En í dag ákvað ég að nota nokkar rækjur (seinni helminginn af pokanum sem ég eldaði upp úr fyrir nokkrum dögum). Þá notaði ég þær í pastarétt, núna ákvað ég að gera steikt karríkrydduð hrísgrjón og nota rækjurnar út í þau. En reyndar er þetta alveg ágætis réttur þótt rækjunum sé sleppt og það þarf ekkert að nota í staðinn.

_MG_4554

En þegar maður eldar steikt hrísgrjón þarf náttúrlega að byrja á hrísgrjónunum og þau mega ekki vera alveg nýsoðin, þurfa að vera köld. Það er auðvitað tilvalið að nota hrísgrjónaafgang. En þar sem ég átti engan afgang sauð ég grjónin um kaffileytið, breiddi úr þeim á plötu og lét þau kólna og þorna. – Já, og svo þurfa rækjurnar auðvitað að þiðna. Þetta voru kannski svona 125 g. Tólf voru þær allavega. Hráar en skelflettar.

Ég byrjaði svo á að skera niður dálítinn bita (svona 8 cm) af blaðlauk og tvo hvítlauksgeira. Skar svona 2 1/2-3 cm sneið af ananasinum mínum (hann á að endast í að minnsta kosti þrjá rétti), flysjaði hana og skar í bita.

_MG_4556

Ég hitaði 2 msk af olíu á wokpönnu (má vera venjuleg ef maður á ekki wok) og steikti rækjurnar við góðan hita þar til þær höfðu breytt um lit. Það tekur kannski 3-4 mínútur. Hrærði oft í á meðan. Svo tók ég þær af pönnunni með gataspaða og setti á disk.  Nú lækkaði ég hitann aðeins, setti blaðlauk og hvítlauk á pönnuna og lét þetta krauma í svona eina mínútu. Þá stráði ég 2 tsk af karrídufti yfir og hrærði vel.

_MG_4559

Síðan hækkaði ég hitann aftur, sturtaði köldum hrísgrjónunum á wokpönnuna og hrærði vel í. Eða eiginlega hrærði ég ekki, heldur stakk nokkrum sinnum spaða undir grjónin og velti þeim – þannig losna þau betur í sundur og verða alþakin karríblöndu. Þá setti ég ananasbitana á pönnuna, ásamt lítilli lófafylli af rúsínum og annarri af kasjúhnetum (rúsínuóvinum er alveg óhætt að sleppa rúsínunum) og hrærði.

Ég bætti svo á pönnuna svona 150 ml af tómatmauki (eða passata), 1 msk af ostrusósu og 1 tsk af austurlenskri fiskisósu. Hrærði þessu vel saman við, smakkaði og saltaði ögn. Svo hrærði ég rækjunum saman við.

_MG_4566

Þetta græna (örfá salatblöð sem ég átti eftir) er þarna bara upp á útlitið, mér fannst vanta eitthvað grænt en vorlaukurinn er búinn …

_MG_4579

En þetta var alveg hreint ágætt. Tók í mesta lagi 15 mínútur (ef maður á soðin hrísgrjón).

*

Steikt karríhrísgrjón með rækjum, ananas og kasjúhnetum

um 150 g soðin hrísgrjón, köld

biti af blaðlauk

2 hvítlauksgeirar

ananassneið (eða 1 lítil dós ananasbitar)

2 msk olía

125 g risarækjur, hráar

2 tsk karríduft, eða eftir smekk

lítil lófafylli (2-3 msk) rúsínur, gjarna ljósar

svipað magn af kasjúhnetum

150 ml tómatmauk eða passata

1 msk ostrusósa

1  tsk austurlensk fiskisósa

e.t.v. salt

saxaður vorlaukur eða eitthvað annað grænt (má sleppa)

One comment

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out /  Breyta )

Google photo

You are commenting using your Google account. Log Out /  Breyta )

Twitter picture

You are commenting using your Twitter account. Log Out /  Breyta )

Facebook photo

You are commenting using your Facebook account. Log Out /  Breyta )

Tengist við %s