Margnota læri

Og meira lambakjöt … Ég held ég hafi nefnt það í gær að ég hefði grillað lambalæri um helgina en ég keypti reyndar tvö læri og það var bara annað sem fór á grillið. Hitt fékk að þiðna í rólegheitum í ísskápnum þangað til í dag. Það stóð aldrei til að heilsteikja það, heldur var það hugsað í nokkrar máltíðir fyrir einn eða tvo.

Til þess að það verði þarf maður að úrbeina lærið. Ég veit að það vex mörgum í augum að ráðast á svona kjötstykki … Í útlenskum matreiðslubókum stendur gjarna að maður eigi að biðja slátrarann sinn/kjötkaupmanninn að úrbeina fyrir sig og sjálfsagt fær maður nú svoleiðis þjónustu í sérverslunum hér. En ekki þegar maður kaupir lærið sitt úr kæli í Bónus eða frysti í til dæmis Víði eða Iceland (báðar búðirnar eru með læri á þúsundkall kílóið þessa dagana). Þá verður maður bara að gera það sjálfur. Það er ekki svo mikið mál.

Sjálf er ég enginn snillingur í að úrbeina, kann í rauninni ekki réttu handtökin við það, en það tekst nú samt sem áður ágætlega og tekur ekki langan tíma ef maður á þokkalegan hníf. Bara ráðast á lærið og skera alltaf sem næst beini, láta hnífsoddinn fylgja beininu … þetta kemur.

_MG_2438

Ég tók nú engar myndir af úrbeiningunni, enda bar ég mig ekkert fagmannlega að við hana, en það tók mig nú ekki nema svona fimm mínútur að ná kjötinu í heilu lagi af beinunum. Lærið allt var tvö kíló, kjötið rétt tæp 1500 g þegar ég var búin að snyrta það aðeins, svo að kílóverðið á hreinu kjöti er um 1300 kr.

_MG_2441

Ég skar svo kjötið niður. Álitlegasta vöðvabitann, um 400 g, ætla ég líklega að heilsteikja seinna. Annan vöðva, heldur minni (300 g) skar ég í þrjár nokkuð þykkar sneiðar. Allt hitt (um 800 g) skar ég í nokkuð stóra gúllasbita. Skipti svo gúllasinu í tvennt og frysti helminginn, en ekki hitt því það verður lambakjöt í matinn næstu dagana …

_MG_2448

Ég ákvað að byrja á kjötsneiðunum, steikja þær á pönnu og krydda með regnbogapipar (fimmlitri piparblöndu). En það má bara nota svartan pipar. Ég byrjaði á að grófmala piparinn. Til þess nota ég ekki piparkvörn eða neitt slíkt, heldur þessa frumstæðu og einföldu græju sem ég er búin að eiga í tuttugu ár og gæti varla verið án.

_MG_2450

Ég kryddaði sneiðarnar á báðum hliðum með piparblöndunni og flögusalti, sótti svo rósmaríngrein út á svalir, skipti henni í sex litla bita og þrýsti einum bita ofan í hvora hlið á sneiðunum.

_MG_2452

Svo hitaði ég 1 msk af olíu á pönnu (steypujárnspönnu auðvitað, en það má alveg vera öðruvísi) og brúnaði kjötsneiðarnar á báðum hliðum við góðan hita.

_MG_2456

Ég skar svo niður 250 g af sveppum og setti á pönnuna þegar ég var búin að snúa kjötinu við. Lét þá krauma með í 3-4 mínútur og hrærði oft. (Ef einhver af sveppahöturunum í fjölskyldunni hefði verið í mat hefði ég notað eitthvað annað, mögulega niðurskorinn kúrbít. En þar sem ég var ein fékk ég að hafa mína sveppi í friði). Kryddaði með pipar og salti.

_MG_2459

Svo hellti ég svona 125 ml af vatni á pönnuna, lagði lok yfir (þarf ekki að vera þétt svo ég notaði bara lok af einhverjum potti), lækkaði hitann og lét malla rólega í 10-15 mínútur, eða þar til kjötið var meyrt.

_MG_2466

Þá þykkti ég soðið með sósujafnara (ég notaði reyndar óvart of mikið, hefði viljað hafa sósuna ívið þynnri), smakkaði hana og bragðbætti með pipar og salti eftir þörfum, og svo tók ég nokkrar grófsaxaðar pekanhnetur og 2 msk af graskersfræjum og stráði yfir. Lét þetta malla í 1-2 mínútur í viðbót. (Það má sleppa þessu ef maður er ekkert fyrir hnetur og fræ.)

_MG_2470

Á meðan þetta var að malla hafði ég skotist út á svalir og tínt blöð af nokkrum salatplöntum, og tók líka nokkrar dvergvaxnar radísur, heilar með laufi og öllu, og blandaði þessu saman í salat sem ég setti á disk með kjötinu og sveppunum.

_MG_2474

Þetta var alveg ágætt, lambið meyrt og gott. Kjötið í máltíð fyrir einn (og það var nóg eftir í nesti á morgun) kostaði 390 krónur.

*

Lambasneiðar með sveppum, hnetum og fræjum

(fyrir 1-2)

300-400 g lambakjöt (lærvöðvi, skorinn í 1 1/2 cm þykkar sneiðar)

regnbogapipar eða svartur pipar, grófmalaður

salt

rósmaríngrein

1 msk olía

250 g sveppir

125 ml vatn, eða eftir þörfum

sósujafnari

5-8 pekanhnetur, grófsaxaðar

2 msk graskersfræ

Auglýsingar

2 comments

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out /  Breyta )

Google+ photo

You are commenting using your Google+ account. Log Out /  Breyta )

Twitter picture

You are commenting using your Twitter account. Log Out /  Breyta )

Facebook photo

You are commenting using your Facebook account. Log Out /  Breyta )

Tengist við %s