Nei, ég er ekkert hætt að blogga. Ég hef hins vegar látið bloggið eiga sig síðustu mánuði af því að ég var á kafi að ganga frá nýrri matreiðslubók sem kemur út í haust (segi meira frá henni fljótlega) og öll umframorka hefur farið í hana. En nú er hún tilbúin í prentsmiðju – eða minni vinnu er allavega lokið – og ég get farið að sinna öðru. Til dæmis blogginu.

Nú ætti ég kannski að koma með einhverja rosalega sumarlega uppskrift en veðrið gefur ekki endilega tilefni til þess – þótt það hafi komið góðir dagar inn á milli, það vantar ekki, þar sem létt og sumarleg salöt eða girnilegur grillmatur hefur verið á borðinu á svölunum hér í Efstalandinu. Og þær uppskriftir koma örugglega. En hér er aftur á móti uppskrift sem gengur á öllum árstímum

Þetta eru vöfflur – belgískar gervöfflur – sem eru hér gerðar enn betri með því að dýfa þeim í súkkulaði. Ég gerði þær upphaflega fyrir þátt í MAN með ýmiss konar steiktu bakkelsi – vöfflum, lummum og pönnukökum, sætum og ósætum.

Ég byrjaði á að velgja 50 ml af mjólk í um 40°C og hella í skál. Svo stráði ég 2 tsk af þurrgeri yfir og lét standa í nokkrar mínútur. Svo bræddi ég 100 g af smjöri í potti, hellti 300 ml af mjólk í viðbót út í og velgdi í um 40°C. Hrærði þessu saman við gerblönduna. Svo tók ég 2 egg, aðskildi þau og hrærði  rauðunum saman við mjólkurblandið, ásamt 2 msk af sykri, 1 tsk af vanilluessens, 1/2 tsk af salti og síðan 300 g af hveiti.

Svo stífþeytti ég eggjahvíturnar í annarri skál og blandaði  þeim gætilega saman við með sleikju. Breiddi viskastykki yfir skálina og lét hana standa á hlýjum stað í um 1 klst.

Ég hitaði svo vöfflujárnið. Setti ausu af soppunni í járnið og steikti vöfflurnar við ríflega meðalhita …

… þar til þær voru gullinbrúnar og svolítið stökkar. Lét þær svo kólna.

Ég bræddi svo 150 g af suðusúkkulaði í vatnsbaði og hellti því á disk. Tók svo hverja vöfflu fyrir sig og dýfði henni í súkkulaðið.

Ef maður vill aðeins láta súkkulaðið þekja brúnirnar á vöfflumynstrinu er vöfflunum dýft létt í bráðið súkkulaðið (og þá má komast af með 100 g af súkkulaði) en vilji maður þekja allt yfirborðið með súkkulaði er þeim þrýst niður (og þá er ágætt í lagi að nota meira).

Láttu súkkulaðið storkna alveg.

Berðu svo vöfflurnar fram með berjum og e.t.v. kókosmjöli til að strá yfir.  Og kannski þeyttum rjóma eða einhverju öðru góðgæti.

Súkkulaðihúðaðar gervöfflur

350 ml mjólk

2 tsk þurrger

100 g smjör

2 egg, aðskilin

2 msk sykur

1 tsk vanilluessens

1/2 tsk salt

300 g hveiti

*

100-200 g suðusúkkulaði

fersk ber

e.t.v. kókosmjöl