Hluti af fjölskyldunni kom í mat í kvöld og að sjálfsögðu gaf ég þeim eitthvað úr sjónum, það er jú fiskbrúar. En þar sem ég er hálflasin og komst ekki í fiskbúð en átti humar í frysti eldaði ég humarrísottó sem hlaut góðar undirtektir. Uppskriftin kemur kannski á morgun en í staðinn er hér uppskrift að öðrum fiskrétti sem ég eldaði um síðustu helgi.

Ég kom við í Nóatúni, einmitt af því að það er fiskborð þar – það þarf sko ekki fiskbrúar til að ég sé með fisk í matinn – og þar rak ég augun í þennan fallega skötusel. Maður sér hann nú ekki mjög oft í fiskborðum og ég stóðst hann ekki þótt hann væri sosum ekki ódýr. Og þegar ég hugleiddi meðlætið mundi ég að ég átti bæði ananas og vel þroskað mangó heima.

Fiskurinn var um eitt og hálft kíló, hentar fyrir svona sex manns en auðvitað er hægt að gera minni skammt. Ég byrjaði á að skera burt beinið og rífa himnurnar af skötuselnum og svo skar ég hann í bita.

Ég setti 3 msk af ólífuolíu í skál og bætti svo við 1 tsk af túrmeriki, 1 tsk af garam masala, 1 tsk af kummini, pipar og salti og hrærði þetta saman. Velti svo fiskbitunum upp úr blöndunni og lét þá liggja nokkra stund – kannski svona hálftíma. Á meðan flysjaði ég hálfan ananas og eitt mangó og skar í bita.

Svo hitaði ég pönnu, setti fiskinn á hana og brúnaði þá á báðum hliðum við góðan hita. Það þarf ekki aðra olíu en þá sem er í kryddleginum. Ég skar líka niður einn kúrbít og tvær paprikur og steikti á annarri pönnu (ef maður er að gera minni skammt er hægt að setja allt á sömu pönnuna.

Ég steikti líka ananasinn og mangóið á enn einni pönnu (já, ég veit, ég á ótal pönnur – en ef maður á það ekki er hægt að byrja á að steikja grænmetið og setja það svo á disk og geyma og steikja ávextina á sömu pönnu). Ég steikti líka einn vorlauk með en það er í sjálfu sér óþarfi.

Þegar ég var búin að brúna fiskinn hellti ég einni dós af kókosmjólk og 150 ml af rjóma á pönnuna, ásamt afganginum af kryddleginum ef einhver er, og lét malla rólega þar til fiskurinn var rétt eldaður í gegn. Heildareldunartíminn gæti verið svona 8-10 mínútur, eftir stærð og þykkt stykkjanna.Ef sósan verður of þykk má bæta við dálitlu vatni. Svo setti ég grænmetið á pönnuna, smakkaði og bragðbætti eftir þörfum og bar þetta fram á pönnunni.

Ég hafði steiktu ávextina sér og bar fram soðin hrísgrjón og salat með.

Ekki sem verst.

*

Karríkryddaður skötuselur með ananas og mangói

1-1,5 kg skötuselur

3 msk ólífuolía

1 tsk túrmerik

1 tsk garam masala

1 tsk kummin

pipar

salt

1 kúrbítur

1-2 paprikur

1/2 ananas

1 mangó

1 vorlaukur (má sleppa)

1 dós kókosmjólk

150 ml rjómi