Hér eru fleiri norður-tyrkneskar meze-uppskriftir. Ég er mjög hrifin af matargerð landanna við austanvert Miðjarðarhafið og á mikinn fjölda matreiðslubóka frá því svæði. Í þættinum sem ég gerði um norður-kýpverskan mat fyrir MAN í fyrravetur, eftir að ég hafði verið á þeim slóðum, studdist ég þó fyrst og fremst við tvær bækur. Önnur þeirra var bók sem ég keypti í ferðinni – í souk-inum í Lefkosa (Norður-Nikósíu) og hefur að geyma einfaldar norðurkýpverskar heimilisuppskriftir. Hin var Oklava, mjög skemmtileg bók eftir Selim Kiazin, en hún rekur samnefndan veitingastað í Shoreditch í London og í bókinni má finna bresk tilbrigði við hefðbundna norður-kýpverska og tyrkneska matargerð.

En hér koma semsagt fjórir meze-réttir í viðbót. Þeir sem ég var með síðast voru flestir heitir eða volgir, þessir eru allir kaldir. Og svo eru ídýfurnar eftir, þær koma líklega næst. Engar myndir af undirbúningnum, bara uppskriftirnar:

Efst léttsýrt rauðkál, í miðið strengjabaunir með möndlum og tómatsalat með granateplafræjum, fremst rauðrófusalat.

*

Rauðrófusalat

200 g rauðrófa, soðin eða bökuð

50 ml vínedik

1 tsk sykur

2 hvítlauksgeirar, pressaðir

svolítið salt

1–2 msk saxað kóríanderlauf (má sleppa)

Hér má vel nota rauðrófu sem keypt er elduð, annars er hún soðin í ediksblönduðu vatni eða bökuð í ofni þar til hún er meyr. Ég skar hana svo í litla teninga. Hrærði edik, sykur, hvítlauk og salt saman í skál, blandaði rauðrófubitunum saman við og lét standa í a.m.k. 1 klst. Blandaði svo dálitlu kóríanderlaufi saman við (en má sleppa).

*

Tómatsalat með granateplafræjum

2–3 vel þroskaðir tómatar

10 cm biti af gúrku

2–3 msk granateplafræ

lófafylli af saxaðri steinselju

3 msk ólífuolía

1 msk sítrónusafi

pipar og salt

Ég byrjaði á á saxaa tómatana smátt, setti þá svo í sigti og lét safann renna af þeim. Skar svo gúrkuna í litla teninga og blandaði þeim saman við, ásamt granteplafræjum og steinselju. Hristi saman olíu, sítrónusafa, pipar og salt, hellti yfir og blandaði.

*

Strengjabaunir með möndlum

150 g strengjabaunir

salt

40 g heilar möndlur, afhýddar

2 msk ólífuolía

1 hvítlauksgeiri, pressaður

Ég byrjaði á að skera endana af strengjabaununum, skar þær síðan í tvennt og sauð þær í léttsöltuðu vatni í 6–8 mínútur (eða samkvæmt leiðbeiningum á umbúðum ef maður notar frosnar). Blandaði þeim svo saman við möndlur, ólífuolíu og hvítlauk og lét kólna (þær eiga samt ekki að vera ískaldar).

*

Léttsýrt rauðkál

200 g rauðkál

1/2 l vatn

1/4 l epla- eða hvítvínsedik

100 g sykur

2–3 negulnaglar

1/2 tsk piparkorn, gjarna marglit

1/3 tsk salt

Ég skar rauðkálið í mjóar ræmur, ekki of langar, og setti þær í skál. Hitaði vatn, edik, sykur og krydd í potti og lét malla í 5 mínútur. Hellti því þá yfir rauðrófurnar, setti lok (eða disk) yfir og láttu kólna. Þegar þetta er orðið kalt má setja það í krukku og geyma í nokkrar vikur, eða borða það strax.