Engar hrakfallasögur í dag, ég ætla bara að skjóta hér inn einum eftirrétti – hann er meira að segja sykurlaus, allavega þegar ég geri hann, en það má alveg setja svolítinn sykur ef manni finnst þurfa. Mér finnst það samt ekki, allavega ekki ef maður notar sæt og frískleg mangó eins og þau sem ég hafði voru. Hörð eða hálfhörð mangó sem ekki eru orðin fullþroska duga hins vegar ekki.

Þessi réttur er ættaður frá Indlandi. Margir austurlenskir eftirréttir eru mjög sætir en það verður semsagt ekkki sagt um þennan. Matarlímið er ekki hefðbundið en ég vildi hafa þetta svolítið búðingslegt.

Ég var semsagt með tvö vel þroskuð mangó sem ég flysjaði og steinhreinsaði og skar svo í bita.

Ég tók svo 6-8 kardimommur (ekki nota malaðar kardimommur), steytti þær í mortéli (það má líka setja þær í plastpoka og merja þær með kökukefli) og plokkaði svo hýðið frá og steytti kardimommufræin enn betur.

Ég maukaði svo mangóið vel í matvinnsluvél (eða blandara), hrærði kardimommunum saman við og blandaði svo 300 g af grískri jógúrt saman við þetta. Bragðbætti blönduna með límónusafa (og ef manni finnst þurfa sykur má hræra dálitlu af honum saman við.

Það má alveg kæla búðinginn á þessu stigi, hann er góður þótt hann sé ekki mjög þykkur, en ég vildi hafa hann þykkari svo að ég lagði tvö matarlímsblöð í bleyti, bræddi þau svo í safa úr hálfri límónu og hrærði þessu saman við mangó-jógúrtblönduna.

Ég hellti svo búðingnum í skálar (eða eina stóra skál) og kældi hann í nokkra klukkutíma. Skreytti með söxuðum pistasíum og fínrifnum límónuberki.

*

Mangóbúðingur með kardimommum

2 mangóaldin, vel þroskuð

6–8 kardimommur, heilar

300 g grísk jógúrt

e.t.v. svolítill sykur

1/2 límóna

2 matarlímsblöð (má sleppa)

nokkrar pistasíuhnetur