Blóðappelsínur, basilíka og jarðarber á steikina

Blóðappelsínutíminn er ekki langur en ég held að hann standi samt enn yfir, að minnsta kosti á ég slatta af blóðappelsínum í ísskápnum. Og þess vegna datt mér í hug uppskrift að salati sem ég gerði fyrir nokkrum árum.

Í þetta salat má nota ýmiss konar meyrt nautakjöt en ég var með hanger-steik, sem mig minnir að ég hafi keypt í Matarbúrinu á meðan það starfaði en ætti að fást í öðrum kjötbúðum. Það má líka nota aðra bita.

Ég hugsaði þetta sem forrétt eða smárétt og þá ætti það að duga fyrir 4-6. En salatið getur líka verið aðalréttur fyrir 2-3.

_MG_4180

Ég byrjaði á að blanda saman 2 msk af ólífuolíu, 1 msk af balsamediki, 1 msk af worchestersósu, nokkrum timjangreinum (eða þurrkuðu timjani), pipar og salti í eldföstu móti, setti kjötið út í og velti því til að þekja það með maríneringu. Lét það liggja í nokkrar klukkustundir og sneri því öðru hverju. Svo hitaði ég grillið vel, penslaði grindina með olíu og grillaði kjötið eftir þykkt og smekk – ég grillaði steikina í 4-5 mínútur á hvorri hlið. Svo má líka steikja kjötið á grillpönnu, eða á pönnu í blöndu af smjöri og olíu.

Eftir að ég tók kjötið af grillinu lét ég það bíða í a.m.k. 10 mínútur – mér finnst best að hafa það við stofuhita. Síðan skar ég það í mjög þunnar sneiðar.

_MG_4183

Á meðan kjötið beið gerði ég jarðarberjasósuna: setti 100 g af jarðarberjum og 10-12 basilíkulauf í matvinnsluvél (eða blandara), skar eina væna blóðappelsínu í tvennt (ef þær eru litlar má nota eina heila) og kreisti safann úr henni yfir, lét vélina ganga þar til komið var grófgert mauk og hellti 3 msk af ólífuolíu smátt og smátt saman við á meðan. Kryddaði  með pipar og salti eftir smekk.

_MG_4230

Ég tók svo tvær vænar lúkur af salatblöndu og dreifði á fat. Skar 100 g af blómkáli smátt og dreifði því yfir. Svo dreifði ég kjötsneiðunum jafnt yfir salatið. dreifðu þeim jafnt á salatið. Ég flysjaði svo eina og hálfa til tvær blóðappelsínur (eftir stærð) með hníf (skar hvíta börkinn alveg af), skar þær í litla bita og dreifði þeim yfir.

_MG_4243

Ég dreypti svo dálitlu af jarðarberjadressingunni yfir salatið og bar afganginn fram með.

*

Nautakjötssalat með blóðappelsínum og jarðarberjasósu

400-500 g nautasteik, t.d. hanger-steik

5 msk ólífuolía

1 msk balsamedik

1 msk worchestersósa

nokkrar timjangreinar

pipar

salt

100 g jarðarber

10-12 basilíkulauf

2-3 blóðappelsínur, eftir stærð

2 vænar lúkur salatblanda

100 g blómkál

 

 

 

 

Auglýsingar

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out /  Breyta )

Google+ photo

You are commenting using your Google+ account. Log Out /  Breyta )

Twitter picture

You are commenting using your Twitter account. Log Out /  Breyta )

Facebook photo

You are commenting using your Facebook account. Log Out /  Breyta )

w

Tengist við %s