Ég hef ekkert skrifað hér að undanförnu, enda eru jólin kannski ekki tíminn til að skrifa matarblogg – allir úttroðnir og þeir sem vantar uppskriftir eru yfirleitt að leita að einhverju sem þeir vita nokkurn veginn hvað er og eiga sennilega hráefnið í en ekki að nýjum hugmyndum og notfæra sér þá frekar það sem skrifað hefur verið um áður.

Svo var ég heldur ekki á landinu og ekki í sérstöku stuði til að skrifa uppskriftir og annað slíkt, hafði um nóg annað að hugsa – en nú sit ég hér á Frankfurtflugvelli og þarf að drepa tímann og er búin að lesa allt internetið (eða svo gott sem) og þá datt mér í hug að setja inn uppskrift. Eða uppskriftir, reyndar; þetta eru eiginlega tveir réttir og þrjú tilbrigði við hvern. Henta ágætlega ef mann vantar smárétti fyrir áramótaveisluna. Eintómt grænmeti svo maður getur talið sér trú um að maður sé þegar byrjaður á janúarátakinu, sko …

Ég gerði þessar uppskriftir reyndar upphaflega fyrir jólablað MAN en svo var ekki pláss fyrir þær þar og þær hafa því ekki birst. En ég var að flýta mér og tók eiginlega engar myndir af undirbúningnum; þetta er samt svo einfalt að það skiptir varla máli. Þetta var semsagt hugsað fyrir jóla- eða áramótaboð en hentar sem snarl hvenær sem er.

Þetta eru annars vegar grænmetislummur og hins vegar fyllt kartöflusmælki – um 30 stykki af hvoru en ekkert mál að breyta magninu í ýmsar áttir.

Bakað kartöflusmælki

um 30 litlar kartöflur

1 msk ólífuolía

pipar

salt

Ég hitaði ofninn í 220°C. Setti kartöflurnar í lítið, eldfast mót, hellti olíunni yfir og kryddaði með pipar og salti. Velti kartöflunum til að þekja þær olíu og bakaði þær síðan í um hálftíma, eða þar til þær voru orðnar vel meyrar og farnar að taka lit. Svo lét ég þær hálfkólna og skar síðan djúpan skurð í miðjuna á hverri kartöflu og setti u.þ.b. 1/2 tsk af fyllingu í hana. Ég skreytti þetta með kryddjurtum en það er út af fyrir sig ekki nauðsynlegt.

 

Grænmetislummur

1/2 lítill kúrbítur

125 g gulrætur

2 egg

60 g heilhveiti

40 g hafragrjón

pipar

salt

mjólk eða rjómi eftir þörfum

75 g smjör

Ég byrjaði á að rífa kúrbítinn og gulræturnar á rifjárni. Hrærði egg, heilhveiti, hafragrjón, pipar og salti saman í skál og bætti við mjólk (eða rjóma) þar til komin var þykkfljótandi soppa. Hrærði svo rifnum kúrbít og gulrótum saman við. Síðan bræddi ég smjörið á pönnu.

Hrærði helmingnum af því saman við soppuna og steikti svo litlar lummur (u.þ.b. 1 sléttfull matskeið hver) í afganginum af smjörinu. Ég lét þær kólna svolítið á eldhúspappír og setti svo álegg á þær og skreytti með kryddjurtum.

Tillögur að fyllingum/áleggi:

 

Rauðrófufylling

100 ml (1/2 dós) sýrður rjómi

60 g bökuð rauðrófa

pipar

salt

*

Tómatfylling

100 ml (1/2 dós) sýrður rjómi

5-6 sólþurrkaðir tómatar

nokkur basilíkublöð

*

Gráðaostsfylling

100 ml (1/2 dós) sýrður rjómi

50 g gráðaostur

e.t.v. svolítið rósmarín

Ég maukaði hráefnið í hverja fyllingu fyrir sig saman í matvinnsluvél (eða blandara).