Jólagotterí (aðventan er nú að byrja)

Ég er nú ekkert sérlega mikið fyrir jólakonfekt og var það heldur ekki á meðan ég borðaði enn nammi (með sykri alltsvo). Satt að segja hefur mér alltaf fundist að það sé varla á sætmetið bætandi um jólin, nóg er nú af kökum og smákökum og desertum og þess háttar.

En jújú, það hefur komið fyrir að ég geri eitthvað af jólasælgæti og þá reyni ég yfirleitt að gera eitthvað einfalt en úr góðu hráefni, frekar en annaðhvort eitthvað flókið sem er vesen að gera eða hrúgur af einhverju misgóðu dóti úr ódýru hráefni.

Ég birti reyndar uppskrift að einföldum súkkulaðidoppum hér fyrir nokkrum árum (vá, ég er búin að blogga hérna það lengi að ég get farið að segja „fyrir nokkrum árum“), þegar ég var nýbúin að fjárfesta í sílíkonmottunni sem ég notaði og sést hér á eftir – bara súkkulaði og einhverju stráð ofan á – það var alveg ágætt. Hér er súkkulaðið aftur á móti kryddað og hnetum og ávöxtum blandað saman við. Það er nú alveg ágætt líka. Ég get alveg vottað það þar sem ég gerði þetta fyrir MAN í fyrra, áður en ég hætti sykuráti (það er kannski hægt að segja að það sé enginn viðbættur sykur í þessu en súkkulaðið er jú sætt og trönuberin líka). Reyndar gæti ég líklega alveg gert sykurlausa útgáfu ef því væri að skipta …

Mottan sem ég var með er ætluð til að baka makónukökur en ég notaði hana til að fá doppurnar jafnstórar og reglulega lagaðar. Ég pantaði þessa mottu erlendis frá á sínum tíma en ég held að svona mottur fáist hérna núna. Mín er með hringjum á báðum hliðum, misstórum, og ég notaði í þetta skipti minni hringina og fékk um 60 doppur úr skammtinum.

Hægt er að nota aðrar tegundir af hnetum og smátt skornum þurrkuðum ávöxtum í doppurnar.

_MG_2092.JPG

Ég byrjaði á að taka súkkulaðipottinn minn, sem er tvöfaldur, og setja dálítið vatn í neðri hlutann. Anars má bara setja skál yfir pott með heitu vatni. Ég tók svo 300 g af suðusúkkulaði braut það í bita og setti í efri pottinn (eða skálina) ásamt ½ tsk af kanel, ¼ tsk af engiferdufti, 1/8 tsk af negul, 1/8 tsk af cayennepipar og smáklípu af salti. Ég hitaði þetta svo rólega þar til súkkulaðið var bráðið; hrærði öðru hverju á meðan til að flýta fyrir.

_MG_2094.JPG

 

Ég tók svo 30 g af möndlum, 30 g af pistasíuhnetum, 30 g af kasjúhnetum og 30 g af þurruðum trönuberjum – en það má semsagt nota aðrar hnetur og önnur þurrkuð ber eða ávexti, bara það sem maður á til eða langar að nota.

_MG_2096

Ég saxaði hneturnar og trönuberin frekar gróft og tók svo nokkrar matskeiðar frá.

_MG_2098

 

 

Svo blandaði ég hinu saman við súkkulaðið þegar það var bráðið og tók pottinn af hitanum.

_MG_2099

Ég tók svo mottuna, setti hana á bökunarplötu (þarf ekki, það var bara til að eiga auðveldara með að færa hana) og setti súkkulaðiblönduna í hringina með teskeið. Það má líka setja þetta bara á bökunarpappír og reyna að hafa doppurnar álika stórar og nokkurn veginn kringlóttar.

_MG_2104

Ég stráði svolitlu flögusalti á sumar doppurnar áður en súkkulaðið harðnaði og stráði svo hnetu- og berjablöndunni sem ég hafði tekið frá á hinar.

_MG_2108

Svo kældi ég doppurnar þar til súkkulaðið var storknað. Tók þær þá af mottunni. Það er best að geyma  þær á svölum stað en ekki í ísskáp.

_MG_2137

Kryddaðar súkkulaðidoppur með hnetum og ávöxtum

 

300 g suðusúkkulaði

½ tsk kanell

¼ tsk engiferduft

1/8 tsk negull

1/8 tsk cayennepipar

flögusalt

30 g möndlur

30 g pistasíuhnetur

30 g kasjúhnetur

30 g þurrkuð trönuber

Auglýsingar

Ein athugasemd Bæta þinni við

  1. Edda skrifar:

    Þetta ætla ég að prófa

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s