Tvíbakað bakkelsi

Sjálfsagt eru fjöldamargir dugnaðarforkar þarna úti sem eru löngu búnir með allan jólabakstur. Kláruðu hann jafnvel í vor, hvað veit ég. Ég er ekki í þeim hópi, baka reyndar lítið fyrir jólin nú orðið og dreg jólabaksturinn sífellt lengra fram eftir jólaföstu – mig minnir að í fyrra hafi ég byrjað að baka til jólanna 19. desember, lokið því 20. desember, borið bakkelsið á borð í Forláksmessuboðinu 21. desember og þegar ég fór úr landi 22. desember var allt búið – eða ég gaf það litla sem eftir var. Ætli það verði ekki svipað í ár?

En reyndar hafði ég bakað dálítið af jólabakkelsi í október og nóvember en það var vegna myndatöku fyrir þætti sem ég var með í MAN og þær kökur voru svo kláraðar samstundis af fjölskyldu og vinnufélögum, allavega ekki treindar til jólanna. Ég hef reyndar alltaf verið þeirrar skoðunar að jólasmákökur séu til að borða á jólaföstunni og helst að vera búnar fyrir jól.

Í fyrra bakaði ég til dæmis biscotti, sem er reyndar ekki kannski jólasmákökur en þetta var fyrir þátt um ætar jólagjafir sem ég gerði. Biscotti eða ítalskar tvíbökur er einmitt alveg upplagt til jólagjafa, þær geymast vel og það er auðvelt að pakka þeim inn á skrautlegan hátt.

Hér er uppskrift að grunndeigi sem nota má í ýmiss konar biscotti, ásamt tveimur tilbrigðum.

_MG_3559

Ég byrjaði á að kveikja á ofninum og stilla hann á 180°C. Þeytt1 svo 2 egg og 140 g af sykri mjög vel saman, þar til blandan myndaði þykka tauma þegar þeytaranum var lyft. Svo blandaði ég saman 250 g af hveiti og 1 tsk af lyftidufti, sigtaði það yfir eggjahræruna og hrærði saman, en bara rétt eins og þurfti til að blanda vel. Þá er grunndeigið komið. Ég skipti því í tvennt af því að ég ætlaði að gera tvenns konar biscotti og setti helminginn í aðra skál.

_MG_3560

Ég hrærði 1 tsk af vanilluessens saman við helminginn af deiginu. Grófsaxaði svo 60 g af pistasíuhnetum og blandaði þeim saman við ásamt 60 g af þurrkuðum trönuberjum.

_MG_3561

Ég reif börkinn af einni appelsínu fínt yfir hinn helminginn af deiginu og blandaði saman við ásamt 60 g af súkkulaðidropum og 60 g af grófsöxuðum möndlum. Ég bætti hveiti við báða deigskammtana eftir þörfum en deigið á að vera lint og klessast svolítið við hendurnar.

 

 

_MG_3562

Ég rúllaði deiginu upp í tvær lengjur.

_MG_3568

Ég mótaði hvorn hluta um sig með hveitistráðum höndum í lengju, um 35 cm langa og um 5 cm breiða. Setti þær á pappírsklædda bökunarplötu  …

_MG_3578

… og bakaði þær á næstefstu rim í 20-25 mínútur, eða þar til þær voru orðnar ljósbrúnar. Þá tók ég þær út og lækkaði ofnhitann í 150°C.

_MG_3580

Ég lét lengjurnar kólna í um 5 mínútur en renndi þeim svo yfir á bretti og skar þær gætilega á ská í um 1-1 1/2 cm þykkar sneiðar.

_MG_3585

Ég raðaði sneiðunum aftur á plötuna en lét skurðflötinn snúa niður. Þær mega liggja mjög þétt. Setti þær svo aftur í ofninn og bakaði í um 8 mínútur. Lét þær svo kólna á grind.

_MG_3725

 

 

Svo má búa um tvíbökurnar á skemmtilegan hátt ef á að gefa þær. Það getur verið flott að hafa þær bara í sellófani en hér setti ég þær upp á endann í litlar fötur og setti svo sellófan utan um og batt það saman með borða. Kökurnar geymast mjög vel og þola ýmislegt hnjask.

_MG_3706

Tvenns konar biscotti

um 30 tvíbökur (15+15)

 

Grunndeig:

2 egg

140 g sykur

250 g hveiti, eða eftir þörfum

1 tsk lyftiduft

*

Í pistasíu- og trönuberjatvíbökurnar:

1 tsk vanilluessens/-dropar

60 g pistasíuhnetur

60 g þurrkuð trönuber

*

Í súkkulaði- og möndlutvíbökurnar:

fínrifinn börkur af 1 appelsinu

60 g súkkulaðidropar

60 g möndlur

 

 

*

180°C í 20-25 mínútur, svo 150°C í um 8 mínútur.

Auglýsingar

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s