Skelfiskskransar

Stundum rekst ég á matarmynd sem hðfðar til mín í blaði eða á netinu, án þess að nokkur uppskrift fylgi, legg hana á minnið og rifja hana upp seinna (eða stundum skoða hana ef ég get fundið hana aftur) og reyni svo annaðhvort að gera eitthvað svipað eða þá nota einhver atriði úr henni til að gera eitthvað annað. Svo hefur komið fyrir að ég hef rekist á uppskriftina og komist að því að það sem ég hélt að væri í réttinum er kannski eitthvað allt annað en mér sýndist á myndinni – eða rétturinn er eldaður einhvernveginn allt öðruvísi en ég hélt.

Rétturinn sem hér kemur er lauslega sniðinn eftir mynd sem ég sá einhverntíma á netinu og fannst flott. Hún rifjaðist svo upp fyrir mér seinna, þegar ég var með hörpudisk sem mig langaði að gera eitthvað fallegt við. Ég fann myndina ekki aftur og mundi frekar óljóst (held ég) hvað var í réttinum þannig að ég ákvað að nota bara það sem ég átti.

Þetta væri fínn forréttur í matarboði; ég notaði stærstu hörpuskelfiskana sem ég fann og reiknaði með fimm á mann en það má líka hafa forréttinn minni og nota þrjá á mann (en endilega oddatölu en ekki slétta).

Uppskriftin birtist fyrst í maiblaði MAN.

_MG_3887

Ég byrjaði á að saxa einn lítinn rauðlauk smátt og einn hvítlauksgeira mjög smátt. Bræddi svo 1 msk af smjöri á lítilli pönnu og lét lauk og hvítlauk krauma í 2-3 mínútur.

_MG_3888

Ég tók svo 150 g af spergilkáli, skar stöngna af því  og setti til hliðar (það má nota þá í annað) og skipti því svo í litla kvisti. Bætti spergilkálinu á pönnuna og lét krauma í nokkrar mínútur í viðbót.

_MG_3892

Ég kreisti svo safa úr 1/2 sítrónu yfir, bætti við 100 ml af vatni (eða ég notaði reyndar að hluta safa úr hörpudiskspokanum – það mætti auðvitað líka nota hvítvín en ég átti það bara ekki til), kryddaði með pipar, salti og fáeinum chiliflögum og lét sjóða þar til spergilkálið var rétt orðið meyrt og mestallur vökvinn gufaður upp.

_MG_3891

Ég tók svo hörpuskelfiskinn (sem ég hafði látið þiðna í ísskápnum, þerraði hann á eldhúspappír og kryddaði með nýmöluðum pipar og flögusalti.

_MG_3893

Svo hitaði ég pönnu vel, setti 1 msk af smjöri á hana og steikti hörpuskelfiskinn í um 1 1/2 mínútu á hvorri hlið við góðan hita. (Þarna er ég reyndar bara að steikja fimm skelfiska og notaði bara teskeið af smjöri eða svo.)

_MG_3896

Hitinn ætti að vera hár svo að skelfiskurinn taki fallegan lit en það má alls ekki steikja hann of lengi. Ég tók hann strax af pönnunni svo að steikingin héldi ekki áfram.

_MG_3897

Á meðan hörpudiskurinn var á pönnunni tók ég grænmetið og dreifði fjórðungi af því í hring á hvern disk. Eða ég notaði reyndar flísar, sem ekki mundi nú falla í kramið á þeirri ágætu síðu We Want Plates, en þarna á þetta nú alveg við (og kemur flott út í myndatöku). En auðvitað má nú bara nota diska líka. Og svo er líka hægt að setja bara stóran hring á eitt fat.

_MG_3913

Og svo raðaði ég hörpuskelfiskinum ofan á kransinn, skar radísur í örþunnar sneiðar og dreifði yfir, ásamt rauðrófuspírum.

_MG_3942

Og svo er bara að bera þetta fram með góðu brauði.

_MG_3945

Mmmmm …

*

Hörpudiskskrans

1 lítill rauðlaukur

1 hvítlauksgeiri

150 g spergilkál

2 msk smjör

safi úr 1/2 sítrónu

100 ml vatn (eða hvítvín eða fisksoð)

pipar

salt

chiliflögur

12-20 risahörpuskelfiskar

nokkrar radísur

1 bakki radísuspírur

Auglýsingar

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s