Hnetusósuhæna

Það er víst að verða eða alveg orðið kjúklingalaust. Og gott ef aðrar kjöttegundir eru ekki að ganga upp líka, sumar hverjar – ég er meira að segja að velta því fyrir mér hvort ég þurfi kannski að endurskoða hluta af því efni sem ég er búin að gera fyrir næsta tölublað MAN, setja eintóma grænmetisrétti (og kannski fisk) í staðinn fyrir kjötréttina því það er náttúrlega ekkert vit í að vera með ófáanlegt hráefni … En við sjáum nú til.

Semsagt enginn kjúklingur en ég á enn brúnhænur í frysti og tók eina út fyrr í vikunni til að elda hana í staðinn fyrir kjúkling. Nú eru svona hænur engir kjúklingar 😉 og koma ekkert í staðinn fyrir þá – það er ekki hægt að taka hænu og elda hana eins og kjúkling. Það þýðir hins vegar ekki að þetta geti ekki verið afbragðs matur. Soðið er sérlega bragðmikið og fuglarnir henta vel í ýmsa pottrétti. Og það var einmitt einn slíkur sem ég ákvað að gera.

_MG_6664

Eins og sjá má er byggingin dálítið önnur en á holdakjúklingi, bringan er hlutfalslega minni og fuglinn allur rýrari. Ég hef áður verið með uppskriftir þar sem ég byrja á að sjóða hænuna heila eða steikja hana í leirpotti en í þetta skipti ákvað ég að elda hana í bitum.

_MG_6666

Ég byrjaði á að skera/höggva sundur bringubeinið og síðan hjó ég hryggbeinið frá til að hluta fuglinn í tvennt. Hryggbeinið má alveg fylgja öðrumhvorum helmingnum en ég hjó það reyndar alveg frá en eldaði það svo með til að fá úr því kraftinn. Svo hjó ég í sundur bringu og læri og var þá komin með fjóra bita (og hryggbeinið).

_MG_6672

Ég hitaði dálitla olíu í þykkbotna potti og brúnaði bitana við góðan hita – tvo í einu því potturinn rúmaði ekki meira.

_MG_6679

Svo setti ég hænsnabitana aðeins til hliðar á meðan ég steikti grænmeti sem ég var búin að skera niður: einn lauk, tvo sellerístöngla og tvær eða þrjár gulrætur. Ég notaði grænmeti sem var aðeins farið að láta á sjá og ég ætlaði bara að hafa í soðið en ekki nota sem hluta af réttinum svo ég var ekkert að flysja laukinn eða gulræturnar, en það má alveg gera það líka og hafa grænmetið með. Svo bætti ég við þremur lárviðarlaufum og kryddaði vel með pipar og salti.

_MG_6682

Ég setti svo hænuna ofan á, hellti sjóðandi vatni yfir – svona tæpum 1 lítra, nóg til að það flyti næstum yfir bitana – setti lok á pottinn og lét malla við hægan hita í svona tvo tíma.

_MG_6699

Þá veiddi ég hænsnabitana upp úr og setti þá á disk …

_MG_6701

… en setti sigti yfir skál og síaði soðið. Það er reyndar óþarfi ef maður ætlar að nota grænmetið en þá þarf bara að muna að fjarlægja lárviðarlaufin (og hryggbeinið ef maður var með það laust). Ég mældi soðið, það var rétt rúmlega 1/2 l.

_MG_6705

Svo skolaði ég og þerraði pottinn og hellti soðinu aftur í hann. Hrærði svo 150 ml af hnetusmjöri og 150 ml af tómatpassata (eða maukuðum, niðursoðnum tómötum) saman við.

_MG_6706

Kryddaði með 1 tsk af kummini, 1 tsk af túrmeriki og dálitlum cayennepipar (ég vildi ekki nota mikið, bragðið af hænsnasoðinu var það gott), smakkaði og bætti við ögn af pipar og salti. Lét þetta malla í svona 15 mínútur.

_MG_6708

Á meðan tók ég hænsnakjötið af beinunum og skar það í munnbita. Það er smekksatriði hvort maður hefur haminn með eða ekki.

_MG_6713

Setti kjötið svo út í sósuna ásamt 3-4 msk af salthnetum og lófafylli af söxuðu kóríanderlaufi.

_MG_6714

Lét þetta malla í nokkrar mínútur. Smakkaði og bragðbætti sósuna eftir þörfum og bætti svo að lokum við 2-3 msk af graskersfræjum og grænu blöðunum af 1 stórum vorlauk, söxuðum – en þetta tvennt er nú ekkert nauðsynlegt svosem.

_MG_6738

Svo bar ég kássuna fram á hrísgrjónabeði og skreytti með kóríanderlaufi.

_MG_6741

Hænan var vel meyr og sósan ansi góð, enda var soðið kraftmikið.

*

Hæna í hnetusósu

1 brúnhæna

2 msk olía

1 laukur

2 sellerístönglar

2-3 gulrætur

2-3 lárviðarlauf

pipar

salt

um 1 l vatn, sjóðandi

150 ml hnetusmjör, helst ósætt

150 ml tómatpassata eða maukaðir tómatar

1 tsk kummin

1 tsk túrmerik

cayennepipar á hnífsoddi, eða eftir smekk

3-4 msk salthnetur (má nota t.d. kasjúhnetur)

lófafylli af kóríanderlaufi

grænu blöðin af 1 vorlauk

2-3 msk graskersfræ (má sleppa)

Auglýsingar

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s