Búin með sósurnar í bili, nú eru það salötin … Nei, reyndar ekki en hér kemur samt eitt. Þetta er frísklegt salat með austurlenskum keim og hentar til dæmis vel með ýnsum grilluðum og steiktum mat en það má líka borða það eintómt og ég hafði það – eða mjög svipað salat – einhverntíma með soðnum hrísgrjónum.

Ég notaði romaine-salat, sem passaði mjög vel, en það mætti líka nota t.d. kínakál eða jöklasalat – allavega er best að nota eitthvert stökkt salat í þetta.

Aðalhráefnið í salatinu er gulrætur og ég notaði 400 g af þeim. Svo var ég með romaine-salat (en það má semsagt vera eitthvað annað), 80 g af salthentum, lófafylli af mintu, 3-4 vorlauka, 1 msk af sætri austurlenskri chilisósu, 1 msk af teriyakisósu (það mætti nota sojasósu), 1 msk af hvítvínsediki, 1 límónu, 2 msk af olíu og 1 hvítlauksgeira.

Ég byrjaði á að léttrista jarðhneturnar á þurri pönnu. Hrærði oft í á meðan og gætti þess að þær brynnu ekki. Hellti þeim svo á disk og lét kólna. Ekki sleppa því að rista hneturnar, þær verða betri.

Svo flysjaði ég gulræturnar og reif þær á grófu rifjárni og saxaði salatblöðin, mintulaufin og vorlaukinn.

Ég setti gulrætur, salat, vorlauk og mintu í skál og blandaði hnetunum saman við.

Svo setti ég chilisósu, teriyakisósu, edik, límónusafa, olíu og smátt saxaðan hvítlauk í litla skál og þeytti saman (má líka setja þetta í hristiglas).

Hellti þessu yfir salatið og blandaði vel.

 

Alveg ágætt bara.

 

Austurlenskt gulróta- og jarðhnetusalat

80 g jarðhnetur, saltaðar

400 g gulrætur

100-150 g salatblöð (ég notaði romaine-salat)

lófafylli af mintu

3-4 vorlaukar

1 msk sæt austurlensk chilisósa

1 msk teriyakisósa

1 msk hvítvínsedik

safi úr 1 límónu

2 msk jarðhnetu- eða repjuolía

hvítlauksgeiri, saxaður smátt