Tengdadóttirin var að koma frá Cambridge þar sem hún er í doktorsnámi og ég var búin að lofa henni góðum fiskrétti. Hún fær ekki mikið af svoleiðis þar um slóðir. Skoskur eldislax, stundum frosinn íslenskur þorskur sem hægt er að nota í plokkfisk, eitthvað svoleiðis. Og þar sem ég held töluvert upp á hana tengdadóttur mína (og þykir fiskur góður) finnst mér gott að geta gefið henni fisk þegar hún er heima.

Mér skildist að á leiðinni til mín hefðu hún og sonurinn verið á einu máli um að líklegast væri að þau fengju steinbít – sem var rétt. Kannski er ég svona fyrirsjáanleg. En ég held allavega mikið upp á steinbít.

Steinbíturinn var keyptur í Nóatúni og þar keypti ég líka vorlauksbúnt. Svo ákvað ég, af því að það er nú ekki á hverjum degi sem hún Tobba kemur heim, að punta upp á fiskinn með rækjum og ég keypti pakka af hráum risarækjum. Ég var nokkuð viss um að ég ætti ýmislegt heima sem mætti nota í góðan fiskrétt.

Það reyndist alveg rétt þegar ég skoðaði í ísskápinn; þar var ein gul og hálf rauð paprika, tæplega hálf krukka af piquillo-paprikumauki og dálítið af steinselju. Og smávegis rjómi í fernu. Og á eldhúsbekknum var bakki með kirsiberjatómötum sem voru búnir að standa þar í meira en viku og voru reglulega fallega rauðir og þroskaðir. Þetta var nú allt mjög litríkt og passaði ágætlega saman.

 

Ég byrjaði á að fræhreinsa paprikurnar og skera þær í bita, ásamt hvíta og ljósgræna hlutanum af vorlauknum. Hitaði 1 1/2 msk af olíu á pönnu og lét þetta krauma við meðalhita í nokkrar mínútur, þar til paprikurnar voru farnar að mýkjast.

 

Þá saxaði ég afganginn af vorlauknum og setti á pönnuna ásamt kirsiberjatómötunum. Kryddaði með pipar, salti og 1/2 tsk af þurrkuðu timjani og lét þetta krauma í nokkrar mínútur, þar til tómatarnir voru farnir að mýkjast upp.

 

Þá hellti ég öllu af pönnunni á disk og setti til hliðar.

 

Svo setti ég 2 msk af smjöri á pönnuna. Skar steinbítinn í stykki, kryddaði þau með pipar og salti og steikti við nokkuð góðan hita í um 3 mínútur. Þá sneri ég þeim og dreifði svo rækjunum á milli þeirra. Steikti fiskinn í 2-3 mínútur eftir þykkt og sneri á meðan rækjunum einu sinni til að steikja þær jafnt. Tók svo fiskinn og rækjurnar af pönnunni og setti á annan disk. Breiddi álpappír yfir.

 

Svo setti ég grænmetið aftur á pönnuna og hrærði paprikumaukinu (um 75 g) saman við, ásamt 300 ml af vatni eða svo. Lét sjóða rösklega í 2-3 mínútur og hrærði svo rjómaskvettu saman við. Smakkaði og bragðbætti með pipar og salti og dreifði svo fiskinum og rækjunum yfir og bætti við smávegis steinselju fyrst ég átti hana.

 

Hafði svo með þessu soðin hrísgrjón og grænt salat.

 

Þetta var ykkur að segja alveg bara hreint ljómandi gott. (Og hefði sosum alveg verið það þótt ég hefði sleppt rækjunum.)

 

Steinbítur í paprikusósu

650 g steinbítur

1-2 paprikur

4-5 vorlaukar

1 1/2 msk olía

250 g kirsiberjatómatar, vel þroskaðir

1/2 tsk timjan, þurrkað

pipar

salt

2 msk smjör

200 g risarækjur (má sleppa)

75 g paprikumauk (piquillo eða annað)

300 ml vatn

skvetta af rjóma (svona 75 ml)

söxuð steinselja (má sleppa)