Bolti, bókmenntir og saltfiskur

Mig langaði í eitthvað litríkt og bragðmikið í matinn, dagurinn var eitthvað svo grár og kaldur … og mér fannst ég vera pínulítið utanveltu í dag, vegna þess að það voru allir að tala um þetta fólboltavesen og svoleiðis og áhugi minn á slíku er í núlli. Eða mínus, reyndar.  Þegar leikurinn var þarna um daginn sem var víst stærsta stund íslenskrar fótboltasögu eða eitthvað (eða hefði verið það ef Bakarameistarinn hefði ekki komist í málið) var ég að horfa á glæpamynd á einhverri norrænni stöð. Taggart eða Barnaby eða eitthvað. Boltaleikir eru bara ekki minn tebolli.

Ég ætla aftur á móti að horfa á afhendingu Bókmenntaverðlauna Norðurlandaráðs í beinni í norska sjónvarpinu annað kvöld. Svona er fólk nú misjafnt. Og ég er náttúrlega að vona að þau fari til hans Andra, sem er næstum því sessunautur minn í vinnunni, bara eitt glerþil sem skilur okkur að og Valeyrarvalsinn hans er svo yndisleg bók. En ég mun líka fagna mikið ef Hallgrímur Helga fær verðlaunin, enda gefum við hann nú út líka.

En þetta kemur allt í ljós og ég þarf að upphugsa eitthvert góðgæti til að narta í á morgun á meðan ég fylgist með strákunum bíða eftir að tilkynnt verði um sigurvegarann (þetta á víst að vera eitthvað eins og Óskarsverðlaunin núna nema ég vona, ef annarhvor þeirra skyldi vinna, að þeir séu með alminlegar þakkarræður og auðvitað helst að þeir þakki mér).

Á meðan er hér saltfiskuppskriftin, því lífið er saltfiskur þegar öllu er á botninn hvolft.

IMG_5197

Þetta var þéttur og fallegur saltfisksbiti af þeirri sort sem kallast hnakki nú til dags og er farinn að ná ansi langt aftur eftir flakinu. Rúmlega 300 g, sem gæti dugað tveimur með góðu meðlæti eins og kartöflum eða hrísgrjónum en er fínn fyrir mig í kvöldmat og nesti til að borða í hádeginu daginn eftir, enda var ég ekki með annað meðlæti en salat og svo auðvitað sósuna  eða maukið. Og í það fóru 3 tómatar, 1 rauðlaukur (má vera venjulegur), lófafylli af steinselju (helst fjallasteinselju), 1 hvítlauksgeiri, 2 tsk kapers (ég var með stór korn en það má nota minni), smáklípa af chiliflögum og svona 1/4 tsk svartur pipar. Og 3 msk ólífuolía.

Ég byrjaði reyndar á að leggja saltfiskinn í bleyti í kalt vatn nokkra stund svo að hann yrði ekki of saltur.

IMG_5200

Ég byrjaði á að saxa laukinn og hvítlaukinn og svo hitaði ég helminginn af olíunni á pönnu og lét laukana krauma við meðalhita í nokkrar mínútur, þar til rauðlaukurinn var farinn að mýkjast svolítið.

IMG_5206

Svo skar ég tómatana í báta og saxaði steinseljuna (stönglana líka) og setti á pönnuna ásamt kapersinum og lét krauma í 2-3 mínútur; hrærði oft á meðan.

IMG_5210

Svo hellti ég svona 100 ml af vatni á pönnuna og hitaði að suðu.

IMG_5214

Ég var búin að roðfletta saltfiskinn og skera í nokkra bita og setti þá út í, jós aðeins yfir þá og setti svo lok yfir, lækkaði hitann og lét malla í 6-7 mínútur.

IMG_5222

Þegar saltfiskurinn var rétt eldaður í gegn tók ég hann upp úr, setti á fat og lagði lokið yfir til að halda honum heitum.

IMG_5217

Hrærði því sem eftir var af olíunni vel saman við maukið á pönnunni og lét sjóða í 1-2 mínútur.

IMG_5232

Svo jós ég maukinu og soðinu yfir fiskinn. Soðið var kannski aðeins of mikið af því að ég var bara með salat með en hefði verið alveg mátulegt ef ég hefði t.d. haft hrísgrjón með, nú eða þá kúskús – þá er upplagt að ausa því vel yfir grjónin. Ég átti aðeins meiri steinselju og skreytti með henni.

IMG_5242

En ég var bara með græn salatblöð, saltfisk og tómatmauk og jós dálitlu soði yfir. Það var alveg ljómandi gott …

Saltfiskur með tómötum og kapers

saltfiskbiti, 300-400 g

3 msk ólífuolía

1 rauðlaukur

1 hvítlauksgeiri

3 tómatar

2 tsk kapers

lófafylli af fjallasteinselju

1/4 tsk nýmalaður pipar

klípa af chiliflögum

um 100 ml vatn

Auglýsingar

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out /  Breyta )

Google+ photo

You are commenting using your Google+ account. Log Out /  Breyta )

Twitter picture

You are commenting using your Twitter account. Log Out /  Breyta )

Facebook photo

You are commenting using your Facebook account. Log Out /  Breyta )

w

Tengist við %s