Hollustunammi? … eee … nei …

Ég svaf af einhverrri ástæðu illa í nótt, vaknaði þreytt og með hausverk í morgun, fór að hugsa um hvort ég ætti að treysta mér í vinnuna og mundi þá eftir höggbornum sem er búinn að vera að hamast á klöppinni fyrir utan síðasta mánuðinn (það hefur sína ókosti að byggja hús sitt á bjargi) og er beitt af tvöfaldri hörku þessa dagana til að reyna að ljúka verkinu. Það er nógu erfitt að þola hann þegar maður er fullfrískur. Svo ég var heima í dag.

Hausverkurinn var horfinn um hádegi og eftir það var ég bara þreytt og syfjuð. En ekkert að mér í maganum, sko. Svo ég ákvað að nýta tímann í eins og eina tilraun.Var fyrst að hugsa um að gera eitthvað hollt en svo mundi ég að ég var nú með tiltölulega holla uppskrift í gær og það gengur ekki svona dag eftir dag.

Svo ég ákvað að gera nammi. Jólin að nálgast og það allt.

Þetta nammi getur reyndar litið grunsamlega hollustusamlega út, með ofurberjum og hvaðeina, en það er blekking. Þetta er ekkert hollt. Bara gott.

Það sem ég notaði: 225 g dökkt súkkulaði, 200 ml niðursoðin mjólk, 300 g sykur, 100 g sykurpúðar (ég átti bara gamla, hálfharða og marglita en það gerði ekkert til í þessu tilviki), 100 g pekanhnetur (mega vera valhnetur en pekanhnetur eru betri), 1 poki (80 g) berjablanda (gojiber, múltuber, bláber og ég man ekki hvað fleira) og 1 tsk vanilluessens.

Ég setti niðursoðnu mjólkina og sykurinn í víðan pott, hitaði rólega að suðu og hrærði þar til sykurinn var nokkurn veginn uppleystur.

Ég lét blönduna sjóða í 6-7 mínútur, hafði auga á henni og fylgdist með að ekki syði upp úr og hún færi ekki að brenna (getur gerst ef hitinn er of hár).

Á meðan grófsaxaði ég súkkulaðið og hneturnar og tók svona þriðjung af súkkulaði, hnetum og berjablöndu frá.

Tók líka ferkantað form og klæddi það að innan með bökunarpappír.

Þegar mér fannst sykurblandan nógu mikið soðin slökkti ég undir pottinum og sturtaði sykurpúðum, súkkulaði, hnetum og berjum út í og bætti við vanilluessens.

Svo hrærði ég vel í þessu, þar til súkkulaðið var allt bráðið og samlagað og sykurpúðarnir byrjaðir að bráðna. Það má líka nota litla sykurpúða sem bráðna þá trúlega alveg saman við blönduna. Það er gott líka en ég vildi hafa svolítið eftir af þeim í konfektinu.

Þá hellti ég (eða skóf – þetta er orðið of þykkt til að hægt sé að tala um að hella því) blöndunni í formið og jafnaði yfirborðið eins og ég gat með sleikju. Dreifði svo því sem ég hafði tekið frá af súkkulaði, hnetum og berjum jafnt yfir og þrýsti því aðeins niður með flötum lófa – blandan er orðin það köld að það er engin hætta á að brenna sig en samt nógu heit til að bræða súkkulaðibitana sem stráð er yfir.

Svo setti ég þetta í kæli í 2-3 klst. en tók konfektið þá úr forminu, setti það á bretti og skar það í ferninga.

Og svo er bara að smakka. Ekki verra að fá sér örlitla púrtvínslögg með. Svona upp á heilsuna.

Jújú, þetta var frekar gott.

Svo er bara að setja þetta í dós með bökunarpappír á milli laga. Best að geyma konfektið í ísskáp.

En það verður nú ekki löng geymsla.

Auglýsingar

9 comments

  1. Þessir ekkihollustumolar líta dásamlega út, þeir eru örugglega hrikalega góðir! Svo er alltaf jafn skemmtilegt að lesa textann þinn! 🙂

  2. Virðist vera nammi gottí….. æ, Nanna, þú ert alltaf svo skemmtileg og húmorinn er mér að skapi 🙂

    • Það er örugglega hægt að nota rjóma eða matreiðslurjóma í staðinn en gæti þurft að sjóða þetta eitthvað lengur og ekki víst að útkoman verði alveg sú sama.

    • Hún fæst allavega í austurlensku búðunum, minnir að ég hafi keypt þessa í Mai Tai á Hlemmi. En svo finnst mér að ég hafi séð hana í Nóatúni líka, er þó ekki alveg viss.

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out /  Breyta )

Google+ photo

You are commenting using your Google+ account. Log Out /  Breyta )

Twitter picture

You are commenting using your Twitter account. Log Out /  Breyta )

Facebook photo

You are commenting using your Facebook account. Log Out /  Breyta )

Tengist við %s