Sko, ég kalla þetta múffur og þær eru bakaðar í múffuformum og alles en samt held ég að þótt ég hefði bakað þær í vor hefði ég ekki sett þær í múffubókina, fannst að múffurnar þar yrðu að vera úr einhvers konar deigi og það er ekki til staðar hér. Vissulega eru múffur með hakki í bókinni en þær voru nú handa honum Bangsa og ekki alveg mannamatur (Úlfur dóttursonur minn smakkaði þær til að gá hvort ég væri nokkuð að eitra fyrir hundinn en það telst ekki með).

Ég er reyndar viss um að Bangsi yrði hrifinn af þessum (hann étur svotil allt) en þær eru kannski aðeins of fansí fyrir hunda, þótt Bangsi eigi allt gott skilið. Þær eru hins vegar ágætar fyrir okkur Úlf og annað mannfólk og kosturinn við þær eins og aðrar múffur er að það er upplagt að frysta það sem maður borðar ekki strax og nota svo bara eftir hendinni.

Svo eru líka beikonmúffur í múffubókinni en þær eru úr deigi og minna ögn á amerískar pönnukökur – með hlynsírópi og svoleiðis. Það er ekkert hlynsíróp í þessum en samt svolítil sæta úr tómatsósunni.

Ég átti bæði svína- og nautahakk frá því að ég gerði kjötfarsið í kálbögglana og notaði það en annars má nota hvaða hakk eða hakkblöndu sem manni sýnist. Og auðvitað er hægt að baka þetta bara í einu stóru formi – þá er þetta kjöthleifur/falskur héri. Þá er bökunartíminn bara eitthvað lengri.

Allavega, ég stillti ofninn á 200°C og svo tók ég skál og setti í hana um 225 g af nautahakki og svipað magn af svínahakki, tvö egg, einn lítinn rauðlauk, saxaðan smátt, 3 hvítlauksgeira, saxaða smátt, blöðin af nokkrum timjangreinum og slatta af saxaðri basilíku. Kryddaði með pipar og salti.

Svo bætti ég við 100 ml af tómatsósu, Heinz nánar til tekið.

Ég hrærði þetta allt saman og bætti svo við 200 ml af hafragrjónum og hrærði þeim saman við.

Svo tók ég múffuform úr málmi, klippti nokkra hringi úr bökunarpappír og þrýsti þeim niður í formin og lagði svo tvær beikonsneiðar í kross yfir hvert form. Það má líka sleppa beikoninu, mér skilst að það séu einhverjir sem kunna ekki að meta beikon. Skil ekki svoleiðis …

Svo fyllti ég formin með hakkblöndunni og hafði dálítinn kúf á þeim. Þetta dugði í níu múffur, tvær af þeim beikonlausar.

Að lokum setti ég dálítinn bita af sterkum osti á miðjuna á hverri múffu, þrýsti honum aðeins niður og braut svo endana á beikonsneiðunum inn yfir múffuna. Nema á beikonlausu múffunum, auðvitað … Setti þær svo á næstneðstu rim í ofninum og bakaði þær í 20 mínútur.

Svo tók ég múffurnar úr forminu og bar þær fram með kartöflustöppu og grænu salati.

Þær voru bara alveg hreint ágætar.