Ég bakaði brauð í dag eins og ég geri reyndar mjög gjarna því ég á oftar en ekki deig í krukku í ísskápnum. Ákvað að fá mér bara samloku í kvöldmatinn og þar sem ég átti kjúklingabringu varð  úr þessu kjúklingasamloka. Ekki alveg í Sómastílnum þó.

Ég eignaðist bókina Artisan Bread in Five Minutes a Day eftir Jeff Herzberg og Zoe Francois fyrir þremur og hálfu ári og hún gjörbreytti öllum brauðbakstri hjá mér. Eftir að hafa lesið um aðferðir þeirra fór ég að búa til lint, óhnoðað gerdeig og geyma í krukku í kæli – það geymist í allt að tvær vikur (ég hef samt aldrei átt það svo lengi því ég baka svo oft) og þetta er mjög hentugt fyrir einbúa því maður getur bara tekið smáskammt af tilbúnu deigi og bakað smábrauð – eða eina eða tvær bollur ef því er að skipta. Aðferðinni lýsti ég hér og hef fáu breytt síðan.

Ég hafði einmitt klárað síðasta skammt í fyrradag og átti svo ekki hveiti í gærmorgun svo það var ekki fyrr en í dag sem ég gerði nýjan skammt – 750 ml vatn, 1 msk ger, um 1 kg af brauðhveiti og rúmlega matskeið af salti. Annað var það ekki í þetta skipti en ég blanda hveitið stundum með heilhveiti, spelti eða öðru korni og fræjum. Mér finnst svo skemmtilegt að sjá glútenþráðamyndunina í deiginu eftir að maður slær það niður í fyrsta skipti – hér er það eftir tveggja tíma lyftingu við stofuhita.

Ég stráði maísmjöli (polentu) á pítsuspaðann minn (það má líka nota bretti eða aðra plötu), dýfði báðum höndum vel í hveiti, tók svona kannski þriðjung af deiginu og mótaði aflangt brauð – deigið er mjög lint og klesst og það er ekki hægt að taka mikið á því svo brauðið verður kannski ekkert rosalega fallegt.

Krukkuna með afganginum af deiginu setti ég í ísskápinn en lagði fyrst plastdisk lauslega yfir opið. Ég baka svo úr þessu deigi á næstu dögum.

Ég lét deigið lyfta sér í um 40 mínútur. Eftir 20 mínútur kveikt ég á ofninum og stillti á 225¨. Teygði mig svo upp á skáp eftir leirdiskinum sem ég nota fyrir pítsustein og stakk honum í ofninn til að hita hann. Rétt áður en brauðið fór inn hitaði ég svo vatn að suðu og hellti í lítinn málmbakka sem ég hafði sett á botninn á ofninum. Þetta er til að fá gufu í ofninn og þar með góða skorpu á brauðið.

Venjulega sker ég skurði í brauðið með beittum hníf en í þetta skipti ákvað ég að klippa ofan í það með skærum. Svo penslaði ég það með dálitlu vatni.

Ég tók svo heitan leirdiskinn úr ofninum og renndi brauðinu af spaðanum yfir á hann. Það er ekkert mál út af maísmjölinu. Svo setti ég brauðið í ofninn og bakaði það í um 25 mínútur.

Tók það út, bankaði með hnúunum í botninn til að fullvissa mig um að það væri tilbúið og lét það hálfkólna á grind áður en ég skar fyrstu sneiðina af því. Ekki skera í það um leið og það kemur úr ofninum þótt það sé freistandi.

Svo var það kjúklingurinn: Ég lagði bringuna flata á bretti, lagði lófann ofan á og skar svo inn í hliðina á henni með beittum hníf, næstum (en ekki alveg) alla leið.

Svo opnaði ég bringuna og kryddaði hana með pipar, salti, reyktri papriku og óreganói. Hitaði dálitla olíu á pönnu, setti bringuna á hana og steikti hana í fjórar mínútur eða svo.

Þá sneri ég bringunni og steikti hana álíka lengi á hinni hliðinni (fer þó eftir þykktinni). Um leið setti ég tvær brauðsneiðar á pönnuna (þurrkaði hana létt með eldhúsrúllu fyrst) og ristaði þær létt.

Svo tók ég sneiðarnar af pönnunni, setti aðra þeirra á disk, setti nokkur salatblöð ofan á og skar nokkrar þunnar sneiðar af fetaosti og raðaði ofan á. Svo stráði ég dálitlu óvenjulegu kryddi yfir – þetta er blanda af kakó og chili, sem ég keypti í Hagkaup í sumar og hef notað af og til þegar mér finnst hún eiga við. En það má sleppa þessu eða nota eitthvað annað.

Svo lagði ég kjúklingabringuna ofan á, dreifði nokkrum basilíkublöðum yfir og setti hina brauðsneiðina ofan á. Nei, þetta er ekki samloka til að taka bita af; hún kallar á hníf og gaffal.

Þetta var nú alveg hreint ágætis samloka.