Beikonkonan

Það var ekkert til í ísskápnum nema beikon. Sem er ágætt en mig langaði ekki beint í beikon og egg og svo var heldur ekkert brauð til. Svo ég ákvað að slá tvær flugur í einu höggi og baka beikonbrauð. Fljótlegt, einfalt og gott. Ég er eins og alkunna er á því að allt sé betra með beikoni (eða næstum allt) …

Image

Byrjaði á að setja nokkrar beikonsneiðar (svona 130 g) á þurra, þykkbotna pönnu og steikja þær þangað til þær voru orðnar brúnar á báðum hliðum og stökkar.

Image

Þá raðaði ég þeim á eldhúsrúllublað, lagði annað blað ofan á og setti farg ofan á það og lét standa nokkra stund. Þetta er til að pressa sem mest af fitunni úr beikoninu.

Image

Svona.

Image

Á meðan tók ég fram matvinnsluvélina, setti í hana 100 g af hveiti, 40 g af köldu smjöri í bitum, 1/2 tsk af lyftidufti, 3/4 tsk af þurrkuðu timjani, slatta af pipar og ögn af salti (muna að beikonið er salt). Setti vélina af stað og lét hana ganga þar til þetta var orðið að mylsnu.

Image

Þá bætti ég við einu eggi og lét vélina ganga þar til deigið hnoðaðist í kúlu. Ef það gerist ekki er það of þurrt og þá má bæta við svolitlu vatni. Ef það er hins vegar of blautt til að hægt sé að fletja það út má bæta við dálitlu hveiti.

Image

Svo staflaði ég beikonsneiðunum upp og saxaði þær, og tók lófafylli af basilíku og saxaði hana líka. Það má nota aðrar ferskar kryddjurtir í staðinn, eða þá þurrkaðar.

Image

Blandaði beikoni go basilíku saman við deigið. Ég gerði það í matvinnsluvélinni og notaði púlshnappinn til að þetta saxaðist ekki of smátt en það má líka hnoða það saman við í höndunum. Svo skipti ég deiginu í tvennt því ég ætlaði að gera stórar flatkökur; það má líka hafa þær minni.

Image

Ég flatti deigið þunnt út á hveitistráðu borði (eða marmaraplötu í þessu tilviki). Strauk mestalla beikonfituna af pönnunni sem ég steikti beikonið á með eldhúsrúllublaði og hitaði hana aftur en hafði hitann vægan.

Image

Setti flatkökuna á pönnuna, pikkaði hana með gaffli og steikti hana í svona 2-3 mínútur. Þá sneri ég henni og steikti hana í svona mínútu á hinni hliðinni.

Image

Tók flatbrauðið af pönnunni og setti það á disk. Setti salatblöð og tómata ofan á. Það mætti hafa hvað sem er, alls konar grænmeti, sósur (t.d. pestó eða kryddaða jógúrtsósu).

Image

Ég hafði ætlað að gera vefjur úr brauðinu en það var of stökkt til þess og rifnaði. Svo ég borðaði það bara eins og það kom fyrir. Það var nú bara ágætt líka.

Þetta brauð mætti líka skera í geira eða bita og bera fram sem snarl, annaðhvort með smjöri og jafnvel osti eða t.d. með hummus eða annarri ídýfu.

Auglýsingar

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out /  Breyta )

Google+ photo

You are commenting using your Google+ account. Log Out /  Breyta )

Twitter picture

You are commenting using your Twitter account. Log Out /  Breyta )

Facebook photo

You are commenting using your Facebook account. Log Out /  Breyta )

Tengist við %s