Grænmetissúpa, ekki fyrir grænmetisætur

Það er semsagt til fullt af góðu grænmeti síðan í gær og ég á líka súrdeigsbrauð og smér og þetta kallaði nú alltsaman á einhverja góða súpu. Ég er töluvert fyrir matarmiklar súpur, þær eru líka ágætar fyrir einbúa því yfirleitt má hita þær upp daginn eftir eða kæla og frysta í hæfilegum skömmtum ef maður eldar  stærri skamt en dugir einni svangri konu í eina máltíð. Sem maður gerir alltaf, eða allavega ég.

Image

Svo ég tíndi til það sem mig langaði að hafa í súpunni. Rauðlauk, vorlauk, sellerí, gulrætur, tómata, spínat, kartöflu, spænska papriku og lárviðarlauf. Allt saman ljómandi gott, vissulega. En það vantaði nú eitthvað. Og ég vissi alveg hvað.

Image

Nema hvað. Þetta er naglasúpa (það má nota alls konar grænmeti í hana) og naglinn heitir beikon. Það er örugglega eitthvað til sem ekki batnar með beikoni þótt ég muni ekki eftir neinu í svipinn (jú, pavlova kannski) en í svona súpu er það alveg ídeal. Svo ég skar niður svona 125 grömm. Hitaði örlitla olíu í þykkbotna potti og lét beikonið krauma þar til það hafði allt tekið lit. Svo saxaði ég einn lítinn rauðlauk (má vera venjulegur) og tvo hvítlauksgeira smátt og lét krauma í 3-4 mínútur. Hellti svo meirihlutanum af feitinni úr pottinum.Image

Á meðan beikonið og laukurinn kraumaði flysjaði ég eina bökunarkartöflu, snyrti nokkrar litlar gulrætur og tvo sellerístöngla (geymdi laufin) og saxaði þetta allt fremur smátt ásamt 100 g af vel þroskuðum kokkteiltómötum. Setti þetta í pottinn ásamt tveimur lárviðarlaufum og lét krauma í eina eða tvær mínútur.

Image

Svo stráði ég 1 tsk af kummini, 1/2 tsk af þurrkuðu timjani, pipar og salti yfir, hrærði og hellti 750 ml af vatni í pottinn. Hitaði að suðu og lét malla við vægan hita undir loki í 15 mínútur.

Image

Á meðan tók ég til 4-5 matskeiðar af ísraelsku kúskúsi (perlukúskúsi; gæti alveg eins verið pasta, hrísgrjón eða bara ekki neitt), hálfa papriku, grænu blöðin af vorlauknum, laufin af selleríinu og væna lúku af spínati. Saxaði grænmetið smátt.

ImageSetti kúskúsið í pottinn ásamt papriku, vorlauk og selleríi og lét malla í 6-8 mínútur. Þá smakkaði ég súpuna, bætti aðeins við pipar og salti, hrærði smátt söxuðu spínati saman við og bar hana inn í boðstofu.

Image

Júbb, þetta var alveg hreint ágætis súpa.

Auglýsingar

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out /  Breyta )

Google+ photo

You are commenting using your Google+ account. Log Out /  Breyta )

Twitter picture

You are commenting using your Twitter account. Log Out /  Breyta )

Facebook photo

You are commenting using your Facebook account. Log Out /  Breyta )

Tengist við %s