Fiskur fyrir konu á besta aldrinum

Ég las það einhvers staðar um daginn að fólk væri hamingjusamast (svona að meðaltali) þegar það er 58 ára. Ég verð 58 ára í næsta mánuði og ég trúi þessu bara alveg. Ég er alveg ágætlega hamingjusöm þótt ég sé enn bara 57. Ánægðari með lífið og – já, og sjálfa mig – en ég var þegar ég var yngri. Kannski fer svo strax að halla undan fæti og ég hef engan sérstakan áhuga á að verða gömul miðað við fréttir af ástandinu á hjúkrunarheimilum (eða reyndar langar mig ekkert sérstaklega til að verða mjög gömul hvort eð er) – en er á meðan er og um að gera að njóta lífsins.

58 ár eru nú ekkert hár aldur, svosem, maður er ekkert að komast á grafarbakkann, held ég. Kannski hljóma ég þannig þegar ég er að monta mig af ömmubarninu mínu, rekstarstjóranum – en það skal að vísu tekið fram að ég varð mjög ung amma og hún varð mjög ung rekstrarstjóri.

Mataræði hefur auðvitað einhver áhrif á hve langlífur maður verður en þegar ég ákvað að gera breytingar á mataræðinu fyrr í vetur var það nú ekki til að lengja ævina, það er ekki eitthvað sem ég stefni markvisst að – en vissulega var það til að auka líkurnar á góðu lífi og heilsu á efri árum. Hvernig sem það verður nú allt saman. Það var ekki bara sykurinn, ég hef gert aðrar breytingar líka en sumar hafa eiginlega gerst af sjálfu sér á seinni árum, ekkert sérstaklega með heilsumarkmið í huga, heldur út af breyttum smekk.

Til dæmis verð ég meira og meira fyrir fisk með árunum eins og ég hef áður sagt frá og hann er æ oftar á borðum hjá mér. Og hér kemur uppskrift, sem reyndar birtist fyrst í MAN – lax með hneturaspi og blómkáls-kartöflustöppu. Þeir sem eru glútenlausir geta þá tekið út brauðraspið og notað kannski bara hnetur og þeir sem eru á LKL geta notað eitthvað annað í staðinn fyrir kartöflurnar, kannski bara meira blómkál. Annars er glútenlaust svo 2014 og LKL svo 2013, er það ekki? Nú er það sykurleysið sem gildir …

Allavega, þessi lax er fljóteldaður og sérlega góður. Ég hafði semsagt með honum stöppu úr blöndu af kartöflum og blómkáli en það mætti líka hafa ýmiss konar soðið eða steikt grænmeti, soðin hrísgrjón og fleira.

Ég byrjaði á að stilla ofninn á 200°C. Flysjaði svo 500 g af bökunarkartöflum, skar þær i bita, setti í pott með vatni sem flaut vel yfir og sauð þær í um 10 mínútur. Skipti 400 g af blómkáli í litla kvisti, setti það út í kartöflupottinn og sauð í svona 8 mínútur í viðbót, eða þar til hvorttveggja var vel meyrt.

_MG_4330

Ég setti svo 25 g af valhnetum (eða pekanhnetum), 1/2 knippi af steinselju, rifinn börk af 1 sítrónu og svolítinn pipar og salt í matvinnsluvél (eða blandara) og lét ganga þar til komin var gróf mylsna.

_MG_4333

Þá blandaði ég svona 4−6 msk af pankoraspi saman við, ég held mikið upp á það en það má líka nota gróft brauðrasp.

_MG_4335

Ég var með laxaflak, svona 600-700 g. Ég skar það í 4−5 cm sneiðar þvert yfir, penslaði þær með svolítilli olíu og kryddaðu með pipar og salti. Raðaði þeim svo á pappírsklædda bökunarplötu, dreifði raspblöndunni jafnt á laxasneiðarnar og þrýsti létt niður til að raspið loddi betur við.

_MG_4337

Ég tók bút af bökunarpappír og breiddi lauslega yfir svo að raspið brynni síður. Setti plötuna í ofninn og bakaði laxinn í 4 mínútur en þá fjarlægði ég pappírinn og bakaði í 3−4 mínútur í viðbót, eða þar til laxinn var rétt eldaður í gegn og raspið farið að taka lit.

_MG_4339

Á meðan gerði ég stöppuna: Hellti vatninu af kartöflunum og blómkálinu þegar það var tilbúið. Setti svo 50 g af smjöri út í og stappaði þetta saman.

_MG_4341

Kryddaði  stöppuna með pipar og salti eftir smekk og svo blandaði ég lófafylli af grófsöxuðu klettasalati saman við. Það mætti líka nota nokkur basilíkublöð eða sleppa þessu alveg.

_MG_4351

Og svo bar ég laxinn fram með stöppunni.

_MG_4392

Lax með hneturaspi og blómkáls-kartöflustöppu

*

Lax með hneturaspi

600−700 g laxaflak, beinlaust

1 msk olía

pipar

salt

25 g pekan- eða valhnetur

1/2 knippi steinselja

rifinn börkur af 1 sítrónu

4−6 msk af grófu brauðraspi (ég notaði pankorasp)

*

Blómkáls-kartöflustappa

500 g bökunarkartöflur

400 g blómkál

50 g smjör

pipar

salt

lófafylli af klettasalati eða nokkur basilíkublöð (má sleppa)

Auglýsingar

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out /  Breyta )

Google+ photo

You are commenting using your Google+ account. Log Out /  Breyta )

Twitter picture

You are commenting using your Twitter account. Log Out /  Breyta )

Facebook photo

You are commenting using your Facebook account. Log Out /  Breyta )

Tengist við %s